Blog History

ကျွန်မ ဘလော့ဂ် ရေးလာတာ ၃နှစ်ကျော်ပါပြီ။ တိတိကျကျပြောရရင် ၂၀၀၃ခုနှစ်၊ အောက်တိုဘာလ၊ ၂၁ရက် နေ့မှာ ပထမဆုံး ဘလော့ဂ် ပို့စ်ကို ရေးသားခဲ့ပါတယ်။ ပထမဆုံး ဘလော့ဂ် အိမ်လေးက Tripod မှာပါ။ နောက်တော့ ဇန်နဝါရီလ လောက်မှာ Xanga ကို ပြောင်းခဲ့ပါတယ်။ ကျွန်မရဲ့ အဲ့ဒီ ဘလော့ဂ်မှာတော့ အင်္ဂလိပ်လိုပဲ ရေးပါတယ်။ တစ်ခါတစ်လေမှာတော့ မြန်မာသီချင်း အချို့ကို မြန်မာလို ဘာသာပြန်ပြီး ရေးပါတယ်။ အဲ့ဒါကလည်း jpg တွေကို တင်ရုံပါပဲ... Xanga မှာ မြန်မာလို ရေးရတာ အလုပ်ရှုပ် သလားလို့... ဒါပေမယ့် တစ်ခါတစ်လေ တော့လည်း သူများတွေ ဘလော့ဂ်ကို မြန်မာလိုတွေ ရေးနေကြတာ တွေ့တော့ အားကျမိသား... ဒါနဲ့ပဲ ကျွန်မလည်း သူတို့လို မြန်မာဘလော့ဂ် တစ်ခု သက်သက်လုပ်မယ် ဆိုပြီး ချိန်နေတာ ကြာပါပြီ။ ဒါပေမယ့် ကျွန်မလည်း အင်တာနက် ကဖေးရောက်တာနဲ့ ကိုယ့်ရဲ့ အင်္ဂလိပ် ဘလော့ဂ်မှာ ရေးလိုက်၊ သူများ ဘလော့ဂ်တွေ လိုက်ဖတ်လိုက် ၊ ဂျီတော့ခ် သုံးလိုက်နဲ့ အချိန်တွေ ကလည်း ခဏလေးနဲ့ ကုန်ကုန်သွားတယ်။

အရင်တစ်ပတ် တနင်္ဂနွေနေ့က ဖော်ရမ် မမ်ဘာ အချို့နဲ့ တွေ့ဆုံ စကားပြောဖြစ်တဲ့ အခါကျမှ သူတို့အချင်းချင်း မြန်မာလို ဘလော့ခ်ရေးနည်း အကြောင်း ဆွေးနွေး နေကြတာ ကြားတော့မှပဲ ငါလည်း တကယ် လုပ်မှ ဖြစ်မယ်ဆိုပြီး ဟိုးအရင်က register လုပ်ထားတဲ့ Blogspot က နေရာလေးကို ပြန်ဝင်ဖြစ်ပါတယ်။ ဟိုးအရင်က သူများဘလော့ဂ်မှာ ၀င်ပြီး comment လုပ်ဖို့ register လုပ်ထားတာကလည်း ကြာပြီဆိုတော့ password မေ့နေလို့ မနည်း ပြန်စဉ်းစားယူ ရပါတယ်။ နောက်ဆုံး ၀င်လို့ရတော့ template ကို မြန်မာစာ ရေးလို့ အဆင်ပြေအောင် ပြင်ပါတယ်။ ဒါကတော့ သိပ်မခက်ပါဘူး.... ကျွန်မ တော်လို့တော့ မဟုတ်ပါဘူး... ကိုယ့်အရင် ဘလော့ဂ် လုပ်ထားတဲ့ လူတွေဆီက How To... ပို့စ် လေးတွေ ဖတ်ပြီး အဆင်ပြေသွားတာပါ။ ကိုညီလင်းဆက် ရဲ့ ဘလော့ဂ်ကနေ ကြည့်တာပါ။ (ကဲ..ဒီမှာ credit လုပ်လိုက်ပြီနော်။ :P)

ကျွန်မ ကတော့ အချိန်သိပ်မရလို့ ready-made template ပဲ website မှာ သုံးထားပါတယ်။ အရောင်ကတော့ ကျွန်မ အခုတလော ကြိုက်နေမိတဲ့ ပန်းရောင်ပါပဲ။ ကျွန်မရဲ့ Xanga site မှာလည်း ပန်းရောင်ပဲ သုံးထားပါတယ်။ ကျွန်မကတော့ ကိုယ့် website ရဲ့ template တွေကို ရိုးရိုးရှင်းရှင်းပဲ ကြိုက်ပါတယ်။ အချို့ကတော့ ဝေဖန်တယ်။ နင့် template မျူိး ကလေးတောင် လုပ်နိုင်တယ်တဲ့... ဒါပေမယ့် သူတို့ ဘာပြောပြော ကျွန်မကတော့ simple template တွေပဲ ကြိုက်တယ်။ မျက်စိနောက်စရာ ၊ ရှုပ်ယှက်ခတ်နေတဲ့ template မျိုးကို မကြိုက်ဘူး။ ပြီးတော့ အရောင် မှောင်မှောင်ကြီးတွေလည်း သိပ်မကြိုက်ပါဘူး။ ကျွန်မရဲ့ ဘလော့ဂ်ကို ဖတ်လိုက်ရင် ရှင်းရှင်းလေး ဖတ်လို့ရစေချင်ပါတယ်။ အဲ့ဒါနဲ့ပဲ simple template တွေပဲ သုံးဖြစ်ပါတယ်။

ဒါပေမယ့် Blogspot ကတော့ Xanga ထက် ပိုပြီး feature ကောင်းတယ် ထင်ပါတယ်။ Template ကိုလည်း လိုသလို ပြင်လို့ရပြီး sidebar မှာလည်း ကြိုက်တာ ထည့်လို့ရတယ်လို့ ထင်ပါတယ်။ သေသေချာချာ မစမ်းရသေးပါဘူး။

ကျွန်မအထင် မြန်မာပြည်မှာ အင်တာနက်သုံးသူ အတော်များများမှာ Zawgyi-One ဖွန့် ရှိမယ်လို့ ထင်ပါတယ်။ ဒါကြောင့် ဒီ font ကို ပဲ သုံးထားပါတယ်။ ဒီ font နဲ့ ပတ်သက်ပြီး Alpha ကထုတ်တဲ့ `ယူနီကုတ် မြန်မာစာ စာရိုက်စနစ်´ လေးကတော့ ကျွန်မအတွက် တော်တော် အဆင်ပြေပါတယ်။ ကျွန်မကတော့ Unicode တွေ ဘာတွေ သိပ်မသိပါဘူး။ ဒါပေမယ့့် နောင်အနာဂတ်မှာ ဒီ font system ကိုပဲ အခြေခံပြီး နိုင်ငံတကာသုံး အဆင့်အထိ သွားနိုင်မယ်လို့ ကျွန်မမျှော်လင့်ပါတယ်။

ခက်တာကတော့ ဒီ font ကို လူသိနည်းပါသေးတယ်။ မြန်မာပြည်မှာ သိသူများပေမယ့် ပြည်ပမှာ သိပ်မသိကြ ဘူး လို့ ထင်ပါတယ်။ တစ်ချို့တွေက သိပေမယ့် သူတို့ install လုပ်ထားတဲ့ font က Zawgyi-One မဟုတ်လို့လားမသိဘူး... သူတို့ ယူနီကုတ်နဲ့ရေးထားတဲ့ ဘလော့ဂ်တွေကို ဖတ်လို့ မရဘူးလို့ ပြောကြပါတယ်။ ပါဠိလိုလို မြင်ရတယ်လို့ ပြောပါတယ်။ သူငယ်ချင်းတစ်ယောက်ကို Zawgyi-One Keyboard Layout ကို install လုပ်ခိုင်းတော့ စက် hang သွားတယ်လို့ပြောပါတယ်။

အကယ်၍သာ ကမ္ဘာမှာရှိတဲ့ မြန်မာတိုင်း ဒီလိုမျိုး font စနစ် တမျိုးကိုပဲ သတ်သတ်မှတ်မှတ် သုံးမယ်ဆိုရင် မြန်မာ blog community လည်း တိုးတက်လာမယ် ထင်ပါတယ်။ ဒါပေမယ့် မြန်မာ ယူနီကုတ ်ပညာရှင်တွေလည်း ဒီလိုမျိုး စနစ် ရဖို့ လုပ်နေကြတယ်လို့ သိရှိရပါတယ်။ (ကျွန်မ ယူနီကုတ ်အကြောင်း မသိဘူးလို့ ပြောပြီး ပြီနော်။) တစ်ချိန်မှာတော့ ဖြစ်လာမယ် ထင်ပါတယ်။

-+-+-+-

အခုနားထောင်နေတဲ့ သီချင်း
- Lexy – Let Me Dance

ကိုရီးယားအဆိုတော် Lexy ရဲ့ သီချင်း မြူးမြူးလေးပါ။ နားမလည်ပေမယ့် အလယ်အပိုဒ်မှာ အင်္ဂလိပ်လို ဆိုတော့ လိုက်ဆိုလို့ ရပါသေးတယ်။ နားမလည်တဲ့ သီချင်းတွေ နားထောင်ရတာ တစ်ခါတစ်လေ ကောင်းပါတယ်။ တစ်ချို့ အချစ်သီချင်း တွေဆို အဓိပ္ပာယ် မသိတော့ သီချင်း နားထောင်ပြီး မျက်ရည် မကျတော့ဘူးပေါ့... :P